كتبت دودي شوقي:
تعبت بحق
وبتمنى يا قلب الحيرة جوايا تبطل دق
وتخمد ثورة البركان
تعبت بحق
وجعت أمان
ولساك يا غريب عطشان
ومش قادر تقول الآه
وماشي في رحلة النسيان
وشايل كل أحمالك على ضهرك
وتتعلم تقول لنفسك
وتتعلم تصيغ قهرك
ما ترتاح حبة وسيبني أرتاح
كفاية النار بتحرقني
يا عم أرجوك خلاص سيبني
يا كتلة نار محشورة ما بين الأضلاع
كفاية أوجاع
فلو تسكت وترحمني
هاكون شاكر
ولو تتباع
هبيعك واشتري صوان
وأرتاح لي يومين من القلب
هابيعك آه يا أتعب قلب